مع وجود الكثير من المدربين والدورات مع ذلك البعض منا محتار يبدا من وين ويحس بالضياع كيف يبدا بتطوير ذاته ،
مبدأيا احييكم على هذا الشعور وانزعاجكم منه لانه يعتبر دليل جيد لوعيك بهالمرحله، ترا في كثير ناس ضايعين من سنين ولا يدرون حتى انهم ضايعين ومستمرين في طريقهم ، لكن لين تتضايق من المرحلة الي انت فيها معناتها انك مستعد من داخل للمرحلة التالية،،
موضوع اليوم مفيد وعميق جهزوا مشروبكم المفضل وخلونا نبدا 💗
بتكلم اليوم عن كيف نبدا رحلة التغيير في حياتنا
بس قبل لانبدأ بطرح عليك سؤال ، ليش تبي تتغير؟ هل عندك عادات سلبيه تبي تتخلص منها؟ أو مشاعر سلبيه عالقة عندك تبي لها حل؟ أو ممكن تبي بس تزيد انتاجيتك ! أو ممكن مليت من الطريق الي انت فيه وماعدت تحس انه يلهمك نفس قبل فتبي تسوي شي جديد!
حدد اسبابك وغايتك من التغيير ، ممكن تجلس وحيداً في مكان هادي لمدة ساعتين على الاقل بدون جوال واسال نفسك هذا السوال وتعمق في الاجابه كل ماكانت اجابتك اعمق ودوافعها قوية كل ماكان التغيير اكثر فعالية
هذي الاسباب الي ذكرتها ممكن تكون محرك لشعور الضياع الي قاعد انت تحس فيه ، حدد اسبابك بوضوح💗
رحلة التغيير تاخذ وقت وتغيير العادات وتغيير نمط الحياة لا يعتبر شي سهل وفي يوم وليلة تقدر تحصل عليه لذلك الموضوع راح ياخذ وقت وجهد فخذ الموضوع حبة حبه بالتدريج حتى تصل للشي الي انت تبيه
اليوم راح اشارككم نقاط مهمه وملهمه تساعدك تبدأ في رحلة التغيير الي تبحث عنها:
1. اول خطوة للتغيير تبدا من المشاعر، تعرف على نفسك أكثر ماهي مخاوفك الحالية وماهي نقاط قوتك وضعفك ؟ كيف تتعامل مع مشاعرك السلبية وكيف تعزز مشاعرك الايجابيه المشاعر هي المحرك الاساسي لنا وتلعب جزء كبير من يومنا وتصرفاتنا لذلك انك تتعلم ادارة مشاعرك ومهارة ادارة مشاعرك والتعامل معها هذا الشي راح يساعدك انك تتعامل مع احداث حياتك بطريقة مرنة أكثر
كيف اتعلم هذي المهارة؟
راقب مشاعرك واعرف ماهي المشاعر الطاغية عندك ؟ هل خوف من المستقبل؟ أم غضب من الماضي هل هي تأنيب؟
وعيك بالمشاعر هي اول نقطة في مرحلة التغيير انصحك هنا بالتدوين ، ٥ دقايق كل يوم صبح اكتب فيها مشاعرك الي تحس فيها واسباب هذي المشاعر ، بعد اسبوع راح تتكون عندك فكرة جيدة عن المشاعر الي تغلب عليك هالفترة وتعرف انت وين بالضبط
2. تعلم كيف تعبر عن شعورك
What you reveal will heal
ماتكشفه تشفيه
تعلم انك تعبر عن مشاعرك بدل ما انك تكتمها في داخلك ، لان الشعور مرات اذا عبرت عنه وقلته ممكن يتشافى من نفسه مجرد ان احنا تكلمنا عنه وعبرنا عنه ، لكن لما تكتم الالم والشعور فراح يزيد بداخلك بشكل اكبر
ممكن ان احنا نعبر عن مشاعرنا من خلال هوايات نحبها الرسم والشعر والكتابه كلها هوايات وممارسات تفرغ طاقتنا وتخلينا نعبر عن ذاتنا
3. تعلم شي جديذ
مهارة جديدة ، لغة جديدة ، هواية جديدة اي علم جديد راح يفتح لك ابواب جديدة ويعرفك على مشاعر جديدة بداخلك ماكنت تعرفها
4. واجه الخوف من الفشل
الجميع عنده هذا الخوف لكن بدرجات مختلفة
في تمرين حلو راح اشارككم اياه تقدرون تجربونه لو حابين
هذا التمرين يقويك من الداخل ويخليك صعب تنكسر ويخليك اكثر مرونه ويخليك ماتخجل من كل شي
التمرين لرائد الاعمال نوح كاكان
اسمه the coffee challenge او تحدي القهوة
يقترح نوح ويقول في كل مرة تحدى نفسك تروح على كوفي شوب اطلب منهم خصم 10% حتى لو مافي اي مناسبة وشوف ردود افعال الويترز، في ناس بتقولك اكيد طبعا وفي ناس بتقول لا ماعندنا هالخدمة!
هذا التمرين في كل مرة ممكن تصيب معاك أو تخيب وتجرب شعور ان حد يرفض طلبك راح تبدا تتعود على الرفض ان عادي الناس تقولي لا ! بالتالي ثقتك من الداخل تصير اقوى وتصير تعرف انك لك الحق انك تطلب وتكسر حاجز الخوف من الرفض ، هالتمرين مش سهل ولكنه ممتع ويستاهل التجربة!
طبعا نوح تمادى شوي وكتب انك يجب انك لو لمرة وحدة في حياتك انك تجلس في كرسي طياره مش كرسييك ويجي المضيف ويقولك يلا قوم🙈 هذا التمرين نفس الشي راح يساعدك انك تكسر حاجز الخجل والاحراج
5. غير نمط حياتك
ابدا اكتسب عادات جديدة مانقدر نتكلم عن موضوع تصميم نمط الحياة بدون لا نتكلم عن انت كيف تقضي يومك وكيف انت اخترت روتين يومك ، هل حياتك ماشية باسلوب ردة الفعل ؟ او ان عندك روتين وعادات صممتها في يومك عشان توصل لطريقة الحياة المثالية بالنسبه لك ؟
يقول البراء العوهلي في بودكاست فنجان من ثمانية، تخيل اسلوب حياتك بعد ١٠ سنين بالتفصيل ، كيف راح يكون يومك ؟ الساعة كم راح تقعد الصبح من معاك فالغرفة كم عدد عيالك شلون شكل غرفتك وين ساكن اصلا شنو اول شي تسويه الصبح شنو موديل سيارتك ورايح حق عملك ولا مكتبك الخاص ؟
من خلال اجابتك تقدر تبدا اليوم تصمم طريقة حياتك وتتخذ قرارات كبيرة مثل الزواج والبزنس وغيرة الي بتوصلك لحياتك المثالية!
مدة ١٠ سنين تكفي انك تغير مسار حياتك تماما! يعني لو تخيلت نفسك طبيب يمديك الحين تبدا تدرس الطب، لو تخيلت نفسك في تخصص غير تخصصك او عمل غير عملك او صاحب بزنس او عندك مبلغ معين تقدر تبدا اليوم 🤍🤍
6. اذا تشعر بالضياع قول لي من هم اصحابك ومن هم الدائرة المحيطة فيك يقول عليه الصلاة والسلام المرء على دين خليله فلينظر احدكم من يخالل، من اصحابك وشنو هي اهتماماتهم وكيف طاقتهم ؟ ايجابيين يحفزونك يدعمونك ينصحونك أو يجرونك لسلوكيات ومشاعر سلبية؟ انتبه انا ماقولك اترك اصدقائك ! لكن ركز انك تحطيك نفسك بمجتمع يرفعك ويرفع طاقتك ناس عندها افكار جديده ناس تتكلم عن الافكار الجديدة والفرص والتطوير والبزنس كون لك مجتمع يساعدك انه يرتقي فيك
7. حدد اهدافك الي تبي تحققها
لاتخلي الامور عايمة على امل ان راح يصير موقف او شي في حياتك ويرتبها، خلك دقيق اكتب اهدافك، صمم ال vision board الخاصه فيك واكتب رسالتك وهدفك في الحياة، اعرف إلى اين انت متجه وشنو تملك الآن من مهارات وقدرات
شاركتكم اليوم ٧ نقاط راح تساعدكم تبدون بالتغيير، تذكروا ان شعوركم بالضياع هو اول نقطه لانطلاقك بذلك ادعوكم انكم تبدون تطبقون هذي ال ٧ نقاط بالتدريج
